برنامج الحب انا والبطيخ وهواك - ضحكة من القلب

السلام عليكم ورحمة الله وبركآته



انا و البطيخ وهوااك .. برنامج .. للحب.. و عن الحب

مع اوووسامه منير


الحب

ذلك الشعور السهلبيسي الذي يزعزغ عقول البشر
و يهشك قلوبهم


مستمعينا لسه بنتكلم عن الحب وحلقتنا النهارده عن

الاستهبال في الحب

معاكم اسامه منير علي نجوم fm مزيكا علي كيف كيفك

في.. انا و البطيخ و هواك

من دلوقتي ولمدة ساعتين
مستنين تليفوناتكم علي 7077
او علي 9555025
او علي ايميل البرنامج
علي بطيخ أّت بطيخ دوووت كوووم
برعاية ابليس كومباني و ان تاتش و كريمات زحلقها


دايما بتمر بينا اوقات بنحس فيها اننا مش قادرين نعيش من غير الحب و من غير الحبيب
و الشعور دا متولد و منبثق من الاحساس التواجدي الكوني في اللامركزيه العصبيه للقلب

و دايما بتقابلنا مواقف كلها استهبال في الحب
ياترى احنا بنعمل ايه و رد فعلنا بيكون ايه لما نقابل حد بيستهبل في الحب ..
وخصوصا اننا جيل موبايلات و انتوا عارفين ان انا حاسس بيكم و حاسس بمشاكل الجيل كلها ...

اولا الرصيد اللي بيخلص في يوم و انت لسه شاحن كارت ب 100 و تفضل تحرق في دقايق علي حبيبتك و في الاخر لما الرصيد يقرب يخلص تقولها بحبك بحبك امموووه
تقولك انت بتستهبل يا حبيبي اتلم لساويرس يشفنا



او حبيبتك اللي تفضل تكنسل عليك تكنسل عليك عشان استخسرت فيها كوزين درا علي الكورنيش
و انت اصلا مفلس مش لاقي تاكل و لما تيجي تصالحها علي الموبايل تلاقيها بتكنسل ..
فتضطر تصالحها بكارت ب 5 و تستهبل .. تلاقيها بتصرخ في وشك و تقول
انت بتستهبل؟؟
اقل من 200 متورنيش وشك



و حبيبك اللي ييجي في اوقات يعمل فيها عالم فلك و يقولك انا بقرا الكف
و يفضل ماسك كف ايدك ولا كأنه شاف ايدين قبل كدا
و في الاخر تقوليله
انت بتستهبل ؟؟ حد يشوفنا
و انتوا اساسا قاعدين في الشارع
مستمعينا الاستهبال في الحب حالة بتمر بكل المهاطيل و المهابيل من ابناء الجيل و لو مستخدمناش عقلنا في الاستهبال بيقلب عباطه
وممكن مغص كلوي

مستمعينا مستني تليفوناتكم علي7077
او علي 9555025
او علي ايميل البرنامج
علي هواك ات نيل راديو بروداكشن دوووت كوووم
برعاية ابليس كومباني و ان تاتش و كريمات زحلقها ياما زحلقها

نستقبل اول اتصال تليفوني و نقول الوو

الوو


الووو


الووووو

واضح ان الخط قطع

- الوو ايوا يا اثامه

اهلا نتعرف بيكي ..

- بثمه

اهلا بيكي يا بسمه ياريت تعلي صوتك شويه

- معلش يا اثامه اثل انا بتكلم من تحت البطنية ..

مفهوم طبعا عشان محدش يقفشك و انت بتتكلمي
بثمة بنتكلم النهارده عن الاستهبال في الحب .. تقدري تقوليلي يعني ايه الاستهبال في الحب و بيمثل لك ايه

- بص يا اثامه اولا انا بموت موت موت جدا طحن في البرنامج بتاعك و والله مش بفوت ولا حلقة منه ابدا خالث
و ثلملي علي الشقي الحكروت موت موت حتومه و قوله انه لذيذ اووووي و بنحبه مووت موووت ..


هو بيضحك وفاتح بقه اهوه و بيقولك
مرسي ليكي يا بسمه


- يا اثامه انا بكلمك عشان الحلقة بتاعتك النهارده مخثوث عشاني
انا كنت بحب واحد و انا في 2 ابتدائي و فضلنا نحب بعض للجامعة


جميل


- اهـء اهـء اهـء


لا اهدي يا بسمه و قوليلي ايه اللي حصل

- يا اثامه اخد كل حاجة من عمري وحياتي

اححمم
حتى الموبايل


-
اهـء هـء هـء

طيب اهدي يا بسمه
بصي يا بسمه
الحب شعور متبادل بين اتنين
مينفعش طرف واحد من غير الطرف الاخر و لازم الاتنين يكونوا متفاهمين و متعاونين
هو دا الحب اللي هايدوم طول العمر و بكدا نحل كل المشاكل اللي تقابلنا حتى مشكلة غسيل الالوان مع الابيض .. لان تايد
برغوته الجديدة حل المشكله
مستمعينا نسينا نقول ان تايد من رعاة البرنامج
مع تاااااايد في الغسيل مفيش مستحييل
بشكرك يا بسمه علي اتصالك و بهديلك اغنية السوبر ستار عمرو دياب ....




نص ساعة اعلانات ..




انا و البطيخ و هواك برنامج للحب و عن الحب
مع اوووووسامه منير



الحب
لحظات من الامل متولدة في وسط غابات الغضب البشري الجارف المتعارض مع احداث الحياة
فالحياة بدون حب
كالشجرة بدون موبايل ..

مستمعينا لسه بتكلم عن الحب و لسه بنسأل عن الاستهبال في الحب
مستني تعليقاتكم علي 7077 او علي 9555025
او علي ايميل البرنامج
علي هواك بطيخ أّت بطيخ دوت كوم برعاية ابليس كومباني و ان تاتش و كريمات زحلقها و بيبسي و كوكا كولا و تايد و برسيل و اومو و اريال ..



الوقت بيمر معاكم بسرعة و حاتم بيضحك مش عارف علي ايه بس تقريبا عشان البت اللي بتبيع ترمس علي كوبري ابو العلا حولت له 5 جنية رصيد ..

هاه ؟؟ عشره رصيد

طيب اشطه يا حتوم .. اخوك بقا هاه


نستقبل اتصال تليفوني و نقول الووو

الووو

الووو


الوووووو



الوو ايوا يا اسامه

اهلا نتعرف بيكي

ياريت تعلي صوتك لان الصوت بعيد اوي

معلش اصل انا بكلمك من الحمام

انا سمسم من المنوفية

اهلا بيكي يا سمسم


سمر بتكلم النهادرة عن الاستهبال في الحب
انت ايه رأيك في الاستهبال عامة و خصوصا في الحب

اسامة انا عاوزه اقولك في الاول انت انت احلى و اجمل اعلامي و صوت شفته في حياتي و انا بسجل كل الحلقات بتاعتك و بحبك اوووي يا اسامه

ربنا يخليكي يا سمسم..

انا كنت بحب واحد نجار مسلح و بعدين كنت في يوم ماشية في الشارع لابسه باضي جميل و ديق موووت و بعدين واحد عاكسني فحبيبي شلحف

مين ياسمر ؟؟

شلحف هو اسمه شادي بس انا بدلعه شلحف
قام ضارب الواد اللي عاكسني بالعتله الحديد شاقق له دماغه
هو دلوقتي في السجن
و انا بحبه اوي يا اسامه و مش عارفه اعمل ايه
و اهلي بيضغطوا عليا مووووت مووووت عشان اتجوز واحد قد ابويا
اسامه انا مش عارفه اعمل ايهه

بصي يا طمطم

_سمسم

اه سوري
بصي يا سمسم
بنقابل ناس في حياتنا بنحبهم و بيحبونا و ديما كتير بنكون شبهمم و زيهم .. حتى الحب نفسه سعات بيحب انه يتكون على حبيب و حبيبه
وحبيبك بيحبك و ان شاء الله يطلع بالسلامة
بس تعرفي هو لو كان العتله الحديد مصنوعه من حديد عز اكبر مصنع في الشرق الاوسط و المصدر الرسمي لحديد الجدار العازل كان حبيبك زمانه مشنوق دلوقتي لان حديد عز يتميز بالصلابه و القهوه و السيخ مظبوط و بالتمام ..

شكرا يا سمسم على اتصالك و بهديلك اغنية السوبر ستار محمد فؤاد


يا مسجون في لومان طره
نفسي اكل معاك كوزين دره




مستمعينا لسه بتكلم عن الحب و لسه بنسأل عن الاستهبال في الحب
مستني تعليقاتكم علي 7077 او علي 9555025
او علي ايميل البرنامج
علي بطيخ أّت بطيخ دوت كوم برعاية ابليس كومباني و ان تاتش و كريمات زحلقها و بيبسي و كوكا كولا و تايد و برسيل و اومو و اريال ..



نص ساعة اعلانات



اس ام اس كتيررررمعانا النهاردة و برضة اميلات كتيييييييير

هااي اسامه بحبك مووت... وبحب صوتك .. صوتك بيريحنى ولا احسن علبة دوا اسهال .. بجد وهدؤك بالكلام انا بحبه اوى موووت انا اتعرفت على واحد من ع النت وقابلته بس نفسى احسسه بمشاعرى اعمل ايه ارجو الرد يااحلى اعلامى واعذب صوت فى الكون..
__________________

هاى يا اسامة ازيك يا جميل
البرنامج جميل جدا وانت كمان مواضيعك تحفة .. وعايزاك تقول لجابر انى بحبه جدا وميزعلش منى ابدا.. رغم كل اللي بيعمله و رغم انه قليل الادب و دايما بيعمل حاجات سوفاج بس بحبه
اصل__________________

هاى اسامه انا محمود من الاردن عاوزك تقول لهبة اننا مش هانفترق تاني ابدا ابداا
حتى لو فضلت تقرقض في ضوافر رجليها ببقها ..
__________________


هااي اسامه يا احلي و اجمل صوت في الدنيا
اسامه بليز ممكن حلقه عن الحب من طرف واحد اصل اخوك كهربائي سيارات ...
بحبك مووووت يا سوكا

__________________

هااي يا اسامه انت اجمل و احلي صوت في الكون كله
ارجوك يااسامه قول لحسن انه مهما دور على حد ممكن يحبه ويسامحه ويغفر له كل حاجه مش هيلاقى غيرى لانى بحبه بصدق ومش

معلش يا جامعة اعذرونى لو الرسايل بتجى متلخبطة شوية
لكن انا بحاول على اد مقدر اكمل الناقص
آة
اهة

ومش عاوزة منه اى حاجه
خالص.. و هتنازل عن تمن الموبايل اللي ضربوا مني في الشهر اللي فات و باعه و جاب بيه كُلة عشان يشمها ..

__________________

اسامه اسامه اسامه
ازيك يا جميل
على فكره يا عم انت شوفلك حل .. حبيبتى بتحبك
انا محمدين من دمياط .. بحبك قوى يا رضوة
__________________

هاااي يا اسامه ازيك عامل ايه
انا عارفه ان الحب مفهوش كرامه وهو الى خلانى بقيت كدة ازاى بعد كل دة هو اللى يبعد ويختار هو علمنى ازاى معرفش اعيش من غيرة ونسى يعلمنى لما يبعد هعيش ازاى ... بحبك يا بعجررر
__________________

هاااى اسامه انا فى عندى مشكله انا بحب واحده ومش عارف اصرحها خايف يكون الحب من طرف واحد
بحبك يا سندس ااوووي و نفسي اخد الرصيد اللي في موبايلك كله ..

__________________

هاااي اسامه ازيك
انا سنية من القاهرة
انا بحب واحد قد ابويا و مش عارفه اعمل ايه بحبه موووت مووووت يا اسامه عشان شعره الابيض الجميل و فجأة اكتشفت انه سمكري سيارات و ان البويه جت علي شعره
اسامه انا مش عارفه اعمل ايه انت املي الوحيد
__________________

هاااي ا س اس ازيك
انا عيوشه من شبرا و بحب واحد من الصعيد
و اتخانقنا بس لما سمع الحلقة بتاعت البرنامج اللي فاتت جاني تحت البلكونه من الصعيد مشي و قعد يعيط و انا بحبه خالص يا اسامه
بحبك يا صميده موووت موت .

حبيبتك شاهيناز








الوقت بيمر معاكم بسرعة وقت حلقتنا انتهى و حاتم فرحان مش عارف ليه
باين البنت بتاعت الدره حولت له رصيد تاني
كان معاكم اسامة منير علي نجوم اف ام مزيكا علي كيف كيفك
في انا و البطيخ و هواك من 12 لـ 2
بشكر كل اللي كلمنا و اللي بتعت ا س ام اس
مع انا و البطيخ و هواك استنوتا يوم الحد في نفس الميعاد قبل ساعتين من دلوقتي علي نجوم اف ام 100.6
مزيكا علي كيف كيفك

برعاية



ان تاتش
و ماكدونالدز
و مؤمن
و اريال و تايد
خديجه جمال مبارك
سوزان
و كنتاكي
و مصنع كوبايات ام سمير
و كراسة الاول
سلاح التلميذ
سوق الخضار في السبتيه
مصنع كريمات ام وائل
كوافير ام ابراهيم للسيدات و قسم خاص للمحجبات
مزرعة دواجن او احمد لتسمين العجول
النادي الاهلي و الزمالك
اديداس و بوما و نيكي و لوتو و امبروو
اميجو كوتشي بينور
امريكانا الجودة
لانشون حلواني الإخوان
مجلس الشعب
سمنة الهانم


اتمنى يكون البرنامج ده عاجبكم واتمنى اكون قدرت ارسم بسمة

تقبلي مروري